ÓSCAR REBOIRAS LOUREIRO, A NOVA VOZ DA NOVELA NEGRA GALEGA

 Óscar Reboiras puxo o broche final ao VII Mes do Libro cun encontro co alumnado de

1oBACH arredor da súa primeira novela, A agonía das folerpas, galardoada co II Premio de Novela

Galicia Rural 2022.

Despois da presentación realizada por dous alumnos, Alicia e Sergio, o escritor tomou a

palabra. Comezou confesando que se iniciou na escrita sobre os corenta anos, momento no que

recuperou o gusto pola literatura e a escrita. Logo de participar en dous obradoiros literarios,

naceu esta impresionante novela chea de intriga e cunha historia que atrapa desde o principio.

Permitiunos coñecer o seu proceso da escrita: como xurdiu a idea; como descubriu a

aldea de Salgueiro no Parque Natural do Xurés; como querían que fosen os protagonistas da

historia -persoas común, auténticos antiheroes que van medrando co desenvolvemento da

historia- inspirados en características de familiares, amigos e coñecidos; como se

documentou...

Tamén compartiu o seu método de traballo: é un autor compás, que vai descubrindo a

trama a medida que a escribe. Aínda que, si tivo claro desde o principio, que quería contar dúas

historias nas que a realidade histórica e a ficción se mesturasen. Pasado e presente que se unen

a través dunha serie de asasinatos.

Houbo tempo para que o alumnado formulase preguntas e interactuase co escritor, o que

deu lugar a reflexións moi enriquecedoras, entre elas, o papel do xornalismo na sociedade

actual. Finalmente, expresámoslle o noso agradecemento a Óscar Reboiras por ter aceptado o

convite para compartir connosco a súa experiencia literaria.

Con esta actividade o IES pecha un mes de valiosas achegas e recoñecemento por parte

de figuras destacadas da literatura galega. Durante estas semanas, o alumnado tivo a

oportunidade de descubrir de primeira man que detrás de cada éxito literario hai esforzo,

dedicación e constancia. Agardamos poder celebrar o vindeiro ano unha nova edición que nos

permita continuar promovendo a lectura, o pensamento crítico e o diálogo literario.

RAQUEL FERNÁNDEZ FERNÁNDEZ E AS SÚAS “CONTAS DE BUXO” NO VII MES DO LIBRO

 Hoxe pechamos as actividades co gallo do VII Mes do libro organizado pola Biblioteca do

IES Maximino Romero de Lema con dous encontros literarios. O primeiro deles foi con Raquel

Fernández Fernández, autora de Contas de buxo que tivo a oportunidade de ler o alumnado de

4o ESO.

A autora nigranesa comezou revelando que o motivo que a levou a escribir este libro foi

recuperar a excelente relación que tiña coa súa filla antes da adolescencia. Para iso, decidiu

involucrala no proceso creativo, pedíndolle a súa opinión sobre o que ía escribindo. A estratexia

resultou efectiva, aínda que confesou que, en ocasións, a rapaza quería influír na trama, cousa

que non permitiu porque tiña moi clara a idea que quería desenvolver.

A escritora, que traballa no sector da restauración, confesou que sempre lle encantou ler

e escribir, aínda que foi despois de facer un obradoiro de escrita, cando acadou o pulo necesario

para crear esta primeira novela. Asegurou que é posible compaxinar diferentes paixóns ao

mesmo tempo.

A continuación, ao responder ás preguntas formuladas polo alumnado, descubriu que a

novela se basea en feitos reais, especialmente no relativo aos casos de violencia machista que

aparecen, aínda que adaptados á ficción. Neste sentido, advertiu aos e ás asistentes sobre a

importancia de estar atentos aos sinais previos que adoitan preceder este tipo de situacións.

Adiantou tamén que a novela non terá continuidade, xa que considera que a historia debe

pecharse tal como está. Tamén destacou a importancia que lle dá á descrición dos espazos na

súa obra. Mencionou lugares como a praia das Catedrais e Ribadeo, que considera paraxes

excepcionais e que recomendou visitar.

O encontro rematou cun agradecemento por parte do alumnado e profesorado á autora

tanto pola súa visita como pola sinceridade coas que compartiu o seu proceso creativo.

Antes de que se despedise a autora, algúns membros do Club de Lectura de 2o da ESO

reuníronse con ela, xa que leron a súa segunda obra, I’m Obelix, gañadora da XVI edición do

Premio Jules Verne de Literatura Xuvenil. Esta, que tamén lles encantou, aborda o tema do TDAH

a través da experiencia dun rapaz no ámbito escolar.

O Equipo da Biblioteca anima ao alumnado e ao profesorado a descubrir e gozar destas

interesantes novelas, agardando que vos gusten tanto coma aos e ás que xa as leron.

A LITERATURA POPULAR BRILLA NO DÍA DO APAGAMENTO NO CLUB DE LECTURA DE ADULTOS BAIOLENDO

 No día que todos lembrarán como o do “apagamento”, a literatura popular da man de Icía

Varela brillou con luz propia, e foi a gran protagonista na nova cita do Club de lectura de Adultos,

na recta final do VII Mes do Libro. A partir da lectura de Cantareiras, da que Icía é coautora xunto

con Manuel Varela, dedicamos a sesión de onte a falar das Pandeireteiras de Mens, de Eva

Castiñeira de Agrazón ( Muxía) e de Adolfina e Rosa Casás, de Vila da Igrexa (Cerceda), figuras

todas elas homenaxeadas no Día das Letras Galegas 2025.

Icía introduciu a charla comentando o interese que hoxe suscita a literatura popular

fronte ao marxinada que estivo sempre nos plans de estudo universitario e non universitario. Tal

é a importancia que se lle dá, que lles están achegando tanta información nova que xa teñen

material para un segundo volume de Cantareiras.

Falounos de como as Vellas de Mens, Prudencia, Teresa, Asunción, Manuela e Adela,

rompendo os roles que se lle atribuían ás mulleres na sociedade da época, e mesmo tendo que

aturar duras críticas e ser obxecto de burlas, viaxaron coa súa música por Europa e América.

Informounos da alegre Eva Castiñeira que emigrou á Coruña e que a casualidade fixo que

traballase como asistenta na casa dun dos socios da discográfica Ruada, na que recolleron o

seu traballo nun disco e facilitaron que subira aos escenarios con Milladoiro. Explicou que as

duras condicións nas que tiveron que vivir Adolfina e Rosas Casás non restou variedade nin

orixinalidade ás súas coplas, que a musicóloga suíza Dorothé Schubarth recompilou no seu

valiosísimo estudo da música popular galega evitando que se perdesen para sempre.

Os membros do club fixemos preguntas, compartimos reflexións, achegamos

informacións das nosas vivencias que unha vez máis enriqueceron a lectura. Para rematar Icía

asinou exemplares e, mesmo deu uns toques a unha das fermosas pandeiretas que decoraban

o espazo do encontro.

Con esta lectura no Club de Lectura de Adultos quixemos, co gallo da celebración do Día

das Letras Galegas, recoñecer e homenaxear a estas mulleres, pero sen esquecer que hai outras,

tantísimas, que tamén o merecen por participar na tradición das pandeireteiras en Galicia.

PREMIO GALAXIA DE NOVELA 75 ANOS

 

UN PERCORRIDO POLA HISTORIA DO ROCK CONTADA PARA NENOS

 Hoxe o melómano Javier Becerra impartiu un magnífico obradoiro ao alumnado de 1o ESO no que a literatura e a música foron da man, e que se encadra dentro das actividades conmemorativas do VII Mes do libro que estamos a desenvolver no IES Maximino Romero de Lema.

O xornalista, actualmente redactor de La Voz de Galicia, é autor do libro Isto é rock, unha historia ilustrada do rock and roll dirixida a nenos, mais que resulta atractiva para calquera idade.

O especialista musical levou a nenos e nenas por un percorrido da historia deste xénero contada a través dos seus protagonistas desde os seus inicios nos anos 50 en Estados Unidos ata a actualidade. Dende a guitarra e o baile do pato de Chuck Berry, o movemento de cadeira do rei do rock Elvis Presley, pasando The Who que mitigaba o seu enfado co mundo esnaquizando no escenario, a guitarra de Jimi Hendrix que deixaba a todos asombrados co seu son. Sen esquecer, por suposto, The Beatles, The Rolling Stones, Janis Joplin, Led Zeppelin, Ramones, Queen, Blondie, Bruce Springsteen ou o camaleón do rock David Bowie.

Foi explicando a evolución do rock a partir de aspectos como o movemento da cabeza, a vestimenta, o corte e a lonxitude do pelo, a voz aguda dos seus protagonistas... Tamén fixo alusión, unha vez máis!, da invisibilidade que sufriron moitas das mulleres protagonistas porque a industria musical estaba dominada por homes.

Aínda que quedaron moitas figuras sen tratar por falta de tempo, cremos que tanto no libro como no obradoiro, Javier Becerra realiza un excelente labor de divulgación musical que permite ás novas xeracións achegarse a este mundo que moitos deles descoñecían.

TRAS OS PASOS DO NENO LABREGO

A nosa biblioteca segue a desenvolver o programa de actividades para

conmemorar o VII Mes do Libro. Nesta ocasión realizando un roteiro por Gres, en Vila de Cruces,

onde se transcorre a infancia de Balbino, o protagonista de Memorias dun neno labrego, cuxa

lectura emocionou ao alumnado de 3oESO.

A primeira parada obrigatoria foi a Fundación Xosé Neira Vilas, casa natal do autor que

hoxe alberga un museo etnográfico e unha biblioteca con dúas salas de lectura. Recibiunos

Chus, que nos explicou a creación da Fundación e achegounos interesante información sobre a

vida e a obra de Neiras Vilas así como da escritora Anisia Miranda, a súa muller. Coñecemos as

distintas dependencias nas que se conserva boa parte do legado cultural e artístico do

matrimonio e, antes de despedirnos, Chus moi amablemente agasallounos con varios libros

para a nosa biblioteca, entre eles o da novela gráfica de Memorias dun neno labrego.

Despois visitamos o cemiterio parroquial e, ante as tumbas de Pepe e Anisia, lemos un

anaco da novela e fixémoslles unha ofrenda floral. Antes de marchar, admiramos a arquitectura

da igrexa parroquial, situada no mesmo recinto.

A continuación fomos coñecer a Ponte Ledesma e a súa historia. Rematamos o noso

percorrido achegándonos ás Insuas de Gres, onde á parte de coñecer o o monolito dedicado ao

autor, tivemos tempo de gozar da natureza e de desconectar tras o duro período de exames. E

todo grazas á lectura dunha das novelas máis importantes da nosa literatura!