"Erin e o lobo" de Érica Esmorís esperta a maxia da lectura e a creatividade artística no noso Club de Lectura de 1º de ESO.

    O Club de Lectura de 1º de ESO pechou as páxinas de Erin e o lobo, a marabillosa e emocionante novela de Érica Esmorís, cun sorriso de orella a orella e os corazóns cheos de aventuras. A lectura non só nos transportou a paisaxes fascinantes e a unha historia de superación inesquecible, senón que se converteu no motor dun proxecto artístico e colaborativo precioso que encheu de vida a nosa biblioteca.

    Inspirados polo espírito de equipo e a conexión coa natureza que respira o libro, decidimos ir máis alá das palabras. Entre todos, unindo ideas, pinceles e moito esforzo, deseñamos e construmos un lobo xigante de cartón que agora custodia o noso espazo de lectura e que serviu como o escenario perfecto para a nosa gran foto de grupo.

 

O enigma de Sempreviva de Andrea Maceiras

    O Club de Lectura de 1º xa leva como agasallo para ler neste Nadal o libro de O enigma de Sempreviva de Andrea Maceiras para ler este Nadal

    Á volta escudriñaremos a súa fermosa historia.

BO NADAL E BOA LECTURA

RECOMENDACIÓNS LECTORAS PARA O NADAL

 

Cosendo as nosas bolsas

 

    O Club de Lectura de 1º ESO, coa axuda da súa coordinadora adicou o seu tempo de lecer a facer as súas propias bolsas de tela para os libros de lectura.

    Encantoulles tanto esta actividade.

    Agora tócoanos completar o noso kit cun marcapáxinas tamén de tela.

ÁRBORE DE NADAL CON MATERIAL DE RECICLAXE

Este Nadal o alumnado de 1º ESO de Relixión en coordinación co Equipo da Biblioteca crou as súas propias árbores de nadal con follas de libros descatalogados para adornar os seus fogares.

Un comezo inmellorable: 3º e 4º de ESO estrea o club de lectura con «A afogada»

    

O club de lectura de 3º e 4º de ESO non puido comezar de mellor maneira este curso. Para a nosa primeira xuntanza, a obra elixida foi «A afogada», da escritora ceense Rocío Leira, e a experiencia resultou ser un éxito absoluto.

    Por que nos atrapou? A trama policial, ambientada na Costa da Morte, mantívonos intrigados dende a primeira páxina,sentimos os escenarios moi próximos. 

    Conectamos axiña coas súas motivacións e segredos e a xuntanza para poñer en común as nosas impresións foi un fervedoiro de ideas. Pasamos o tempo teorizando sobre os sospeitosos, analizando o final e debatendo sobre os temas máis escuros que agocha a novela. 

    O mellor de todo foi ver como un libro é capaz de xerar tanta conversa, risas e opinións contrastadas entre nós.Sen dúbida, «A afogada» deixou o listón moi alto para as vindeiras lecturas. 

OBRADOIRO DE ORIGAMI DE NADAL

 Hoxe tamén tivemos o obradoiro de origami de Nadal con Luchy en colaboración co departamento de Matemáticas 😁

CHOCOLATADA DE NADAL DO CLUB DE LECTURA

 Hoxe no primeiro recreo tivemos a tradicional chocolatada de Nadal na que nos xuntamos todos os participantes do Club de Lectura Baiolendo.

Rapazas de Agustín Fernández Paz

 

    Libro que aborda temas moi próximos á realidade adolescente, como a amizade, a identidade e os cambios propios da mocidade. A lectura resultou interesante para o alumnado pola identificación coas personaxes e polas situacións que se presentan.     

    Favoreceu a reflexión sobre as relacións persoais e a igualdade.

ABRIL CAMINO PRESENTA O SEU LIBRO MULLERES QUE VIVEN XUNTAS

Abril Camino acompañounos esta tarde no Club de Lectura de Adultos para presentar e falar en torno ao seu libro Mulleres que viven xuntas, que foi galardoada co XLII Premio Xerais de Novela.

Mentres compartíamos un café e uns doces propios destas datas de Nadal, comezou explicando o por que usa un seudónimo nas súas obras, para despois pasar a compartir con nós as motivacións que a levaron a escribir esta novela, na que se visibiliza a historia de amor entre Chus e Isabel, dúas mulleres da xeración da posguerra española.

Esta é unha novela de pares: dúas mulleres, dous tempos (pasado e presente), un narrador en terceira persoa e outro en primeira persoa...Chus e Isabel son parella pero, á vez, son dúas persoas contrapostas; unha leva impresa a represión da sexualidade e a outra vive máis afastada dos prexuízos alleos.

Como a mesma autora manifesta, estamos ante unha historia máis común do que a sociedade quere admitir e cremos que a súa lectura contribúe a normalizala.