30 DE XANEIRO, DÍA DA PAZ
🕊30 DE XANEIRO, DÍA DA PAZ🕊
Dende a Biblioteca, para conmemorar esta data, estivemos elaborando ao longo destas semanas, este mural de pombas feitas nas titorías da ESO e que nos invaden por todo o corredor principal do centro 🕊 Ademais, tanto nas pombas como nas pezas que compoñen o mural, aparecen escritas palabras e textos sobre a Paz. Por outra banda, completamos esta exposición cunha selección de libros relacionados con esta conmemoración.
TALLER DE ORIGAMI POLO DÍA DA PAZ
O venres tivemos no primeiro recreo o taller de origami polo Día da Paz, no que o alumnado fixo unha fermosa pomba 🕊 ☮️
Estes talleres non serían posible sen a colaboración do departamento de matemáticas da man da profesora Luchy.
EXPOSICIÓN “MULLERES DO MEDIEVO GALEGO”
O Equipo da Biblioteca trouxo ao Centro a exposición "Mulleres do medievo galego" dende o 15 ao 26 de xaneiro. Consta de 21 paneis, o primeiro introdutorio e o resto son dez láminas ilustradas e os 10 respectivos textos onde as protagonistas son dez mulleres da nosa historia: Dona Urraca, María Castaña, Lupe Pérez de Traba, Inés de Castro, Maior Guntroda Rodríguez, Aldonça I e Sancha II , Ilduara Eriz, Sancha I ,Tareixa de León e María Peres, A Balteira.
As ilustracións están feitas por 5 ilustradoras galegas; Iria Fafián, Laura Romero, María Montes, Minia Regos e Nuria Díaz.
Con esta exposición, a área de Igualdade da Deputación da Coruña procura dar unha maior difusión a mulleres da nosa historia que foron invisibilizadas e tamén a mulleres artistas actuais non sempre o suficientemente coñecidas.
Dende o Centro queremos agradecer todas estas iniciativas a prol dunha sociedade igualitaria inclusiva e diversa, “unha medida de actuación estratéxica para promover na sociedade un pensamento crítico sobre as desigualdades de xénero, sobre a desaparición das mulleres da esfera pública ao longo da historia, mais tamén na posta en valor do papel das mulleres artistas na sociedade actual”.
EXPOSICIÓN "SOMOS UN CENTRO CONCILIADOR E TOLERANTE?"
SOMOS UN CENTRO CONCILIADOR E TOLERANTE?
O equipo da Biblioteca elaborou esta exposición, con motivo do Día da Paz, para valorar o clima de tolerancia que hai no noso centro. Para iso, o alumnado lerá as preguntas que están colgadas no corredor do lado da biblioteca, e unha vez reflexionadas, collerá un gomet da cor correspondente á opción escollida.
Iniciación segura á pegada dixital e ás redes sociais
O Equipo da Biblioteca promove a formación responsable no uso das redes sociais cun obradoiro dirixido ao alumnado de 2º e 3º da ESO: «Iniciación segura á pegada dixital e ás redes sociais» impartido por David Bascoy. Este obradoiro ten como obxectivo capacitar aos rapaces e rapazas no uso seguro e responsable das TIC. Este obradoiro levouse a cabo o martes 23 de xaneiro.
Durante a sesión introducíronse os aspectos máis relevantes para garantir que os mozos e mozas comprendan a importancia de construír unha presenza en liña positiva e protexer a súa privacidade no mundo dixital proporcionándolles as pautas máis relevantes para crear, manter e configurar perfís seguros nas redes sociais.
O IES MAXIMINO ROMERO DE LEMA GAÑA O SEGUNDO PREMIO DE INNOVACIÓN EDUCATIVA “INNOVAGAL”
O IES Maximino Romero de Lema vén de recibir o segundo premio INNOVAGAL de Inovación Educativa concedido pola Consellería de Cultura, Educación, Formación Profesional e Universidades pola nosa traxectoria de compromiso coa innovación educativa. Para nós é un orgullo porque a Biblioteca sempre está presente na dinamización das actividades que no noso Centro se realizan.
Este premio é un recoñecemento ao importante labor que se desenvolve neste Centro desde hai moitos anos e en ámbitos moi variados, como a igualdade, a lingua, a literatura, o medio ambiente, a música e as artes escénicas, o consumo responsable, a informática, a ciencia e a tecnoloxía, … recibindo recoñecementos e premios tanto a nivel galego como a nivel nacional.
EduReferentes
O Equipo da Biblioteca promoveu a participación do alumnado de 4º ESO no programa EduReferentes, un proxecto educativo posto en marcha pola asociación Executivas de Galicia, que conta co apoio da Consellería de Cultura, Educación, Formación Profesional e Universidades e que ten por obxectivo achegar ás aulas mulleres referentes galegas en diferentes sectores profesionais para que alumnas e alumnos teñan exemplos femininos a seguir, descubran novos ámbitos profesionais e de éxito e aprendan a identificar as súas habilidades e talentos. Divídese en charlas impartidas por dúas mulleres do directorio Referentes Galegas, obradoiros para dar a coñecer a importancia das habilidades brandas entre o alumnado e sesións de mentoría individualizada.
Sandra Sinde, economista, emprendedora e innovadora, explicounos o seu proxecto profesional, centrado no desenvolvemento e implementación de experiencias innovadoras para transformar persoas, organizacións e territorios, destacando o proceso de xénese deste proxecto, xurdido despois de máis de 20 anos de experiencias profesionais noutros ámbitos e en máis de 10 países, que a conduciu ao seu ikigai, o punto no que se conxuga de maneira equilibrada a súa formación, as súas cualidades, os seus intereses e paixóns e as necesidades do contorno e das institucións.
Pola súa banda, Carmen Pomar, psicóloga, profesora universitaria e deputada no Parlamento de Galicia, explicounos as singularidades dos dous ámbitos nos que traballa e como as habilidades e cualidades persoais contribúen a desenvolver o proxecto persoal e vital dunha persoa.
A continuación, a mesma Carmen Pomar desenvolveu un obradoiro no que se explicitou o papel das soft skillsno desenvolvemento dun proxecto profesional: a empatía, a resiliencia, a tolerancia á frustración, a actitude proactiva e positiva... que son fundamentais para a busca e o desenvolvemento profesional e igual de importantes, ou máis, que a formación e os coñecementos técnicos das persoas.
Esta iniciativa continuará cun proceso de mentoría duns alumnos e alumnas por parte dunha muller referente que se desenvolverá posteriormente noutra fase.
Foi unha actividade moi proveitosa, que lle permitiu ao alumnado coñecer a experiencia real de mulleres moi relevantes no seu campo e recoller de primeira man uns consellos e orientacións que de seguro seránlles moi valiosos no seu futuro académico, profesional e vital.
Subscribirse a:
Publicacións (Atom)