CLAUSURA DO CLUB DE LECTURA DE ADULTOS
A visita de Rober Cagiao ao Club de Lectura de Adultos converteuse hoxe nunha magnífica oportunidade para conversar arredor da súa obra Cadea de favores. Durante o encontro, o autor compartiu coas persoas asistentes detalles sobre a creación da novela, as inspiracións da historia e diferentes reflexións sobre a escrita e o proceso creativo.
A sesión desenvolveuse nun ambiente próximo e participativo, no que os lectores e lectoras puideron intercambiar impresións co autor, formular preguntas e afondar nos temas e personaxes da obra, facendo da lectura unha experiencia compartida e enriquecedora.
Con esta actividade pechamos tamén o Club de Lectura de Adultos deste curso, despois de varios meses nos que os libros se converteron nun punto de encontro para o diálogo, a reflexión e o desfrute da literatura.
Queremos agradecer especialmente a Rober Cagiao a súa visita, a súa cercanía e a xenerosidade á hora de compartir esta experiencia co club. Tamén damos as grazas a todas as persoas asistentes e aos autores e autoras que nos acompañaron ao longo do curso.
Animamos a todo o mundo a descubrir e ler Cadea de favores, unha obra que sen dúbida segue deixando pegada entre os nosos lectores e lectoras.
O Club de Lectura retomará a súa actividade o vindeiro curso con novas lecturas e novos encontros arredor dos libros.
.jpg)
O Club de Lectura de 1º de ESO tece redes de memoria compartindo "Os fíos de Begoña" co resto do instituto.
Co gallo da celebración das Letras Galegas, os membros do noso club mergulláronse no libro Os fíos de Begoña, unha obra fantástica de Eva Mejuto editada por Edicións Xerais. Tras ler e debater emocionados esta pequena biografía, os rapaces e rapazas do Club de Lectura de 1º de ESO decidiron ir máis alá e converterse en auténticos divulgadores da nosa cultura. Co obxectivo de espallar o legado da homenaxeada Begoña Caamaño, prepararon con moito agarimo unha presentación especial para achegar a súa figura aos compañeiros de todos os grupos de 1º e 2º de ESO.
O alumnado conectou fondamente cos valores de xustiza, igualdade e activismo de Begoña Caamaño e preparou a presentación unindo forzas, ideas e moita creatividade.
Explicar a biografía a outros grupos reforzou a súa confianza e a oratoria.
O Equipo da Biblioteca encheuse de orgullo ao ver a literatura galega viva nas súas voces.
O mellor desta experiencia foi o ompromiso coa memoria: Os rapaces entenderon a importancia de manter vivo o fío da nosa cultura.
As sesións remataron con debates moi enriquecedores sobre a igualdade e a literatura.
Parabéns a todo o Club de Lectura de 1º de ESO por un traballo tan fermoso, maduro e cheo de sensibilidade. Grazas por seguir tecendo a historia da nosa lingua!.
Subscribirse a:
Publicacións (Atom)