Hoxe tamén tivemos o obradoiro de origami de Nadal con Luchy en colaboración co departamento de Matemáticas 😁
CHOCOLATADA DE NADAL DO CLUB DE LECTURA
Hoxe no primeiro recreo tivemos a tradicional chocolatada de Nadal na que nos xuntamos todos os participantes do Club de Lectura Baiolendo.
ABRIL CAMINO PRESENTA O SEU LIBRO MULLERES QUE VIVEN XUNTAS
Abril Camino acompañounos esta tarde no Club de Lectura de Adultos para presentar e falar en torno ao seu libro Mulleres que viven xuntas, que foi galardoada co XLII Premio Xerais de Novela.
Mentres compartíamos un café e uns doces propios destas datas de Nadal, comezou explicando o por que usa un seudónimo nas súas obras, para despois pasar a compartir con nós as motivacións que a levaron a escribir esta novela, na que se visibiliza a historia de amor entre Chus e Isabel, dúas mulleres da xeración da posguerra española.
Esta é unha novela de pares: dúas mulleres, dous tempos (pasado e presente), un narrador en terceira persoa e outro en primeira persoa...Chus e Isabel son parella pero, á vez, son dúas persoas contrapostas; unha leva impresa a represión da sexualidade e a outra vive máis afastada dos prexuízos alleos.
Como a mesma autora manifesta, estamos ante unha historia máis común do que a sociedade quere admitir e cremos que a súa lectura contribúe a normalizala.
CARI PRESÉNTANOS O SEU LIBRO CORALIA E MARUXA
Esta mañá tivemos a ocasión de abrir unha ventana ao pasado para que nos ilumine e nos permita comprender o presente. Esta pode ser unha síntese xeral do que Cari Camarero nos amosa na súa obra Coralia e Maruxa, un libro que, a través da historia das irmás Fandiño, contribúe a dignificar e reivindicar a historia de todas as persoas que foron represaliadas, silenciadas e vexadas polo franquismo, persoas que sufriron a limitación de todas as liberdades persoais e sociais.
As irmás Fandiño, que coma moitas persoas, homes e mulleres, foron silenciadas e desprezadas, decidiron, nun momento determinado, desafiar e revelarse contra as normas do réxime ante a alternativa de esmorecer no silencio das paredes da súa casa.
Tomando como exemplo a vida destas dúas mulleres, a autora proponnos a toda a sociedade, e nomeadamente á xente nova, que non se deixe levar pola situación actual na que se manifesta, por parte dun sector da sociedade, unha nostalxia do réxime franquista. Animounos a loitar polas liberdades, polo diversidade, polo respecto á pluralidade e pola construción dunha sociedade xusta e respectuosa. Unha importante ensinanza da para a mocidade por parte de alguén que o viviu en persoa e que, coa súa firme paixón de mestra, continúa a formar a sociedade do futuro.
Moitas grazas Cari!
Subscribirse a:
Comentarios (Atom)