DÍA DA PAZ

Para conmemorar o Día da Paz, dende a biblioteca propuxemos un concurso de caligramas para facer nas diferentes titorías.

O caligrama do Día da Paz gañador foi o da nosa alumna Yamila de 1º de Bach.

 

INTELIXENCIA ARTIFICIAL PARA A SOCIEDADE

Hoxe estiveron na nosa Biblioteca Fina Paulos e Óscar Rei, profesores do Departamento de Informática do noso Centro, e presentaron ante o alumnado de 4o ESO e 1o CM Intelixencia Artificial para a Sociedade, “o primeiro libro en galego sobre esta temática” -comentou Óscar.

Dámoslle a benvida a este libro formativo sobre IA xa que somos conscientes de que o alumnado debe familiarizarse coas oportunidades e desafíos que presentan as intelixencias artificiais, especialmente no que respecta á súa integración nas distintas áreas do coñecemento e da vida cotiá.

Óscar e Fina explicaron algunhas das ferramentas de IA que alumnos e alumnas poden empregar para mellorar a súa formación: xerar exercicios das distintas materias para practicar, crear imaxes, cancións de poemas, colorear ou reparar fotos en mal estado, animar fotos....

Agora ben, como destacaron os relatores, a utilización destas ferramentas de IA pode ser un aliado, pero nunca debemos esquecer as súas implicación éticas que supón un uso incorrecto das mesmas.

Agradecémoslles a Fina e a Óscar que nos fixesen partícipes desta novidade bibliográfica.

O CICLO NATURAL DA VIDA CON ROSA ANEIROS

 No Club de Lectura de Adultos Baiolendo continuamos no novo ano lendo obras destacadas da nosa literatura actual e mantendo un encontro cos autores ou autoras das mesmas para enriquecer a lectura individual. No primeiro encontro do 2025 visitounos Rosa Aneiros coa que dialogamos sobre a súa obra A noite das cebolas.

A escritora valdoviñesa permitiunos adentrar no proceso de creación literaria, explicándonos algúns dos cómos e os porqués da súa escrita: a necesidade de saber o comezo e o desenlace antes de pórse a escribir, aínda que o que aconteza no desenvolvemento a sorprenda a ela mesma; a vontade de que a súa nova novela é “un relato no que os lectores non van atopar un ritmo trepidante; é máis unha lectura lenta, un traballo a encamiñado a desfrutar da propia literatura”; a intención de crear un relato moi vitalista a partir da morte...

Fíxonos partícipes de que a historia non ten nada que ver con ela, aínda que moitos aspectos estean tomados da súa propia vivencia: a contorna, o faro, a paisaxe de Valdoviño que corresponde a unha paisaxe imaxinaria, pois cambiou os topónimos; o breve tratado de cultivo das cebolas seguindo os pasos dos seus pais; personaxes que mesturan a varios coñecidos seus; o título do libro....

Comentamos os personaxes máis destacados, sobre todo, o de Abril, a protagonista, unha muller aparentemente forte, que ao longo da novela vai sacando as capas -coma nas cebolas- que a protexeron durante a súa vida para descubrirnos unha gran fraxilidade, ata que lograr reconciliarse consigo mesma e aceptar o seu destino como parte natural da vida.

Durante a velada a literatura con maiúscula foi xurdindo con forza a través de nomes como Agustín Fernández Paz, Marcos Calveiro, María Rei Vilas, Paul Auster ou Antoine de Saint-Exupéry, e puidemos descubrir distintas perspectivas sobre a lectura, unha novela cativadora, de gran beleza para ler de xeito pausado gozando da boa literatura.

DÁLLE UNHA VOLTA AO TEU CONSUMO: XANEIRO

 Pílula informativa mes de xaneiro:

Comezamos o xaneiro cunha nova pequena mostra dos alimentos de tempada da contorna . Acompañamos a mostra coa pílula informativa que nos axuda a reflexionar sobre o noso consumo de produtos frescos:

Apoio á economía local: Comprar produtos locais fomentan a economía da rexión, apoiando aos agricultores e produtores locais, o que tamén pode promover a biodiversidade agrícola e a preservación dos ecosistemas locais.

O CORAZÓN DAS CASAS DE AN ALFAYA

     A elección do libro que abriu as sesións do Club de Lectura de 1º ESO foi todo un acerto:  O corazón das casas de An Alfaya.

    Na primeira sesión propuxémoslles aos membros unha actividade inspirada na protagonista, Eli: realizar uns debuxos a partir dunha enquisa coma as que ela facía ás persoas que querían mercar as casas que reformaban seus pais, ao tempo que vivían nelas. A proposta resultou moi ben acollida e serviu para conectar co libro desde o comezo. 

    Como é habitual nas nosas xuntanzas, acompañamos as reflexións sobre a lectura cun pequeno petisco -compartimos granadas -froita que algúns probaban por primeira vez-,  queixo de San Simón, xamón e chourizo do país ou biscoitos. Mentres tanto, a conversa ía fluíndo arredor da trama, dos personaxes e das partes que cada quen quería destacar. 

    A forma de vida de Eli e da súa familia pareceulles moi peculiar. Colléronlle especial agarimo ao xardineiro Sebastián e á tendeira Candelaria, pero sobre todo empatizaron con Eli, coa súa maneira de ser e co que sente ante a visión dunha pantasma: Mencía, unha nena  misteriosa que se acanea nun bambán, da que coñeceremos a súa historia e que se converterá na súa amiga.

    A oración “todas as casas teñen un corazón e cada corazón agocha un segredo”  inspirounos para facer a foto final ao remate da lectura: Cada membro do club tiña que traer un obxecto especial que gardase un significado persoal, como as casas do libro.

    Foi unha lectura que emocionou, chea de intriga, con mestura entre realidade e imaxinación que os conquistou desde a primeira páxina. An Alfaya destacou, unha vez máis, polo seu estilo poético e evocador, deixando pegada na rapazada lectora.

CANCIÓNS DE NADAL EN FRANCÉS DENDE A RADIO NA BIBLIO

 Dende a biblioteca, en colaboración co alumnado de francés de 4º de ESO e 1º de BACH, realizamos unhas cancións de Nadal en francés dentro do programa radio na biblio.

BO NADAL!

🎄🎄🎄 BO NADAL!!! 🎄🎄🎄

Este ano fixemos a nosa decoración navideña coa cortadora Cricut Maker. O equipo da Biblioteca estamos formándonos no manexo desta máquina que nos facilita a realización de manualidades. Esta foi a primeira que fixemos e o poboado navideño quedounos xenial!

 🎄🎄🎄