PREMIO GALAXIA DE NOVELA 75 ANOS

 

UN PERCORRIDO POLA HISTORIA DO ROCK CONTADA PARA NENOS

 Hoxe o melómano Javier Becerra impartiu un magnífico obradoiro ao alumnado de 1o ESO no que a literatura e a música foron da man, e que se encadra dentro das actividades conmemorativas do VII Mes do libro que estamos a desenvolver no IES Maximino Romero de Lema.

O xornalista, actualmente redactor de La Voz de Galicia, é autor do libro Isto é rock, unha historia ilustrada do rock and roll dirixida a nenos, mais que resulta atractiva para calquera idade.

O especialista musical levou a nenos e nenas por un percorrido da historia deste xénero contada a través dos seus protagonistas desde os seus inicios nos anos 50 en Estados Unidos ata a actualidade. Dende a guitarra e o baile do pato de Chuck Berry, o movemento de cadeira do rei do rock Elvis Presley, pasando The Who que mitigaba o seu enfado co mundo esnaquizando no escenario, a guitarra de Jimi Hendrix que deixaba a todos asombrados co seu son. Sen esquecer, por suposto, The Beatles, The Rolling Stones, Janis Joplin, Led Zeppelin, Ramones, Queen, Blondie, Bruce Springsteen ou o camaleón do rock David Bowie.

Foi explicando a evolución do rock a partir de aspectos como o movemento da cabeza, a vestimenta, o corte e a lonxitude do pelo, a voz aguda dos seus protagonistas... Tamén fixo alusión, unha vez máis!, da invisibilidade que sufriron moitas das mulleres protagonistas porque a industria musical estaba dominada por homes.

Aínda que quedaron moitas figuras sen tratar por falta de tempo, cremos que tanto no libro como no obradoiro, Javier Becerra realiza un excelente labor de divulgación musical que permite ás novas xeracións achegarse a este mundo que moitos deles descoñecían.

TRAS OS PASOS DO NENO LABREGO

A nosa biblioteca segue a desenvolver o programa de actividades para

conmemorar o VII Mes do Libro. Nesta ocasión realizando un roteiro por Gres, en Vila de Cruces,

onde se transcorre a infancia de Balbino, o protagonista de Memorias dun neno labrego, cuxa

lectura emocionou ao alumnado de 3oESO.

A primeira parada obrigatoria foi a Fundación Xosé Neira Vilas, casa natal do autor que

hoxe alberga un museo etnográfico e unha biblioteca con dúas salas de lectura. Recibiunos

Chus, que nos explicou a creación da Fundación e achegounos interesante información sobre a

vida e a obra de Neiras Vilas así como da escritora Anisia Miranda, a súa muller. Coñecemos as

distintas dependencias nas que se conserva boa parte do legado cultural e artístico do

matrimonio e, antes de despedirnos, Chus moi amablemente agasallounos con varios libros

para a nosa biblioteca, entre eles o da novela gráfica de Memorias dun neno labrego.

Despois visitamos o cemiterio parroquial e, ante as tumbas de Pepe e Anisia, lemos un

anaco da novela e fixémoslles unha ofrenda floral. Antes de marchar, admiramos a arquitectura

da igrexa parroquial, situada no mesmo recinto.

A continuación fomos coñecer a Ponte Ledesma e a súa historia. Rematamos o noso

percorrido achegándonos ás Insuas de Gres, onde á parte de coñecer o o monolito dedicado ao

autor, tivemos tempo de gozar da natureza e de desconectar tras o duro período de exames. E

todo grazas á lectura dunha das novelas máis importantes da nosa literatura!

MONTSE FAJARDO DÁ VOZ ÁS MULLERES ESQUECIDAS DE CONXO

 Esta tarde continuamos celebramos o VII Mes do Libro  cunha nova xuntanza no Club de Lectura de Adultos Baiolendo quetivo como protagonista o libro de divulgación Rotas. As mulleres que o franquismo agochou en Compostela, que recupera historias das mulleres internas no único psiquiátrico público de Galicia ata 1953, o de Conxo en Santiago de Compostela.

Tivemos a sorte de contar coa presenza da autora, Montse Fajardo, cuxa perspectiva como investigadora e escritora do texto enriqueceu os comentarios e as reflexións que xurdiron a partir da lectura. Falamos dos motivos que levaban as mulleres ao seu ingreso: perder a razón por ser asasinados homes, fillos... e vivir nun clima de medo e terror imposto pola represión franquista; por simplemente transgredir os roles que a sociedade patriarcal lles reservaba no ámbito do fogar; para ser despoxalas dos seus bens e que o seu home iniciara unha nova vida sen elas; por un “comportamento pouco recatado” segundo a moralidade imperante; por sufrir agresións sexuais tanto dentro da familia coma fóra.... Calquera escusa era válida para o réxime que empregou a psiquiatría para xustificar a represión contra as mulleres.

Foi moi comentado polos presentes o desolador o día a días destas internas en Conxo: a fame, os tratamentos inhumanos, as violacións, as malleiras... Todas empeoraban durante a estancia e para moitísimas, sobre todo para as máis pobres, a morte, voluntaria ou non, foi a única saída.

Historias aterradoras que teñen como fonte os expedientes das pacientes que non se destruíron, pero tamén a memoria oral contada por algunhas das protagonistas ou dos seus familiares como indicou a xornalista e investigadora, e que é necesario dar a coñecer porque forman parte da nosa memoria histórica. É este breve volume, que acadou o premio de ensaio da Semana do Libro de Compostela, contribúe a facelo.

FERNANDO CASTROVERDE INAUGURA O VII MES DO LIBRO DO NOSO CENTRO

 O escritor, crítico literario e docente Fernando Díaz-Castroverde abriu o programa das

actividades literarias que desenvolveremos na sétima edición do Mes do Libro organizadas pola

Biblioteca do IES Maximino Romero de Lema. O autor impartiu ao alumnado de 2o ESO un

obradoiro de microrrelatos no que xogaron coas palabras para crear as súas propias historias.

Ao longo da sesión propuxo diferentes métodos imaxinativos para animar á rapazada a

escribir e a superar os medos asociados ao folio en branco. A partir de láminas de famosos

pintores e, tomando como modelos relatos creados polo escritor, tiveron que artellar cadansúa

narración curta; tamén tiveron a oportunidade de inventar finais para escenas de filmes que

visualizaron ou de redactar breves textos nos que liberaban a imaxinación e transformaban

personaxes que Fernando lles propuña, atribuíndolles novas calidades e accións. Despois de

cada actividade, procedíase á lectura en voz alta das creacións literarias elaboradas, algunhas

delas resultaron ser moi orixinais e intensas.

Para rematar, agradecémoslle ao autor a dedicación e esforzo por mergullarnos no

mundo da escrita cuns agasallos de lembranza e un merecido aplauso. Dende a Biblioteca

queremos insistir unha vez máis en que a lectura e a escrita son dous procesos que van da man:

a lectura é unha habilidade esencial para poder escribir. Por iso hai que ler máis, para escribir

mellor!

VISITA DE FERNANDO CASTROVERDE

 

VII MES DO LIBRO

 COA PRIMAVERA CHEGA UNHA NOVA EDICIÓN DO MES DO LIBRO NO IES MAXIMINO ROMERO DE LEMA

A Biblioteca do instituto de Baio celebra o VII Mes de Libro con encontros con escritores, talleres, presentacións e un roteiro literario.

O lucense Fernando Díaz-Castroverde abrirá esta semana as actividades cun obradoiro sobre escritura impartido ao alumnado de 2o ESO. O vindeiro luns, a escritora Montse Fajardo acompañará ás e aos integrantes do Club de Lectura de Adultos para compartir reflexións sobre a súa última publicación Rotas. As mulleres que o franquismo agochou en Compostela. 

O mércores 9, o alumnado de 3o ESO irase de roteiro literario Tras os pasos do neno labrego por terras de Vila de Cruces nas que visitará a Fundación de Neira Vilas, o cemiterio parroquial onde están soterrados Neiras Vilas e de Anisia Miranda, e outros espazos do lugar de Gres. Javier Becerra, xornalista especializado en prensa musical, realizará un taller no que se mestura literatura e musical a partir da lectura de Isto é rock na que o alumnado de 1oESO descubriu as principais iconas do rock n’roll.

Tras o descanso da Semana Santa, rapaces e rapazas de 1o de Bacharelato terán un encontro literario con Óscar Reboiras que lles falará da súa primeira novela A agonía das folerpas coa que gañou o II Premio de Novela da Galicia Rural. Xa na recta final de abril, Icía Varela e Xosé Manuel Varela Varela presentarannos as súas Cantareiras e realizarán un obradoiro de música e poesía popular. Para pechar a conmemoración o alumnado de 4o ESO terá a oportunidade de compartir a lectura de Contas de buxo coa súa autora Raquel Fernández.

En conclusión, un programa completo que nos permitira neste comezo de primavera somerxernos no mundo do libro e da lectura.