“NÓS SOMOS ELAS ”: PATRIMONIO E MEMORIA
Dende a Biblioteca e durante todo o mes de maio convidámosvos a visitar a mostra itinerante “Nós somos
elas”, promovida pola Asociación Cultural Alexandre Bóveda e pola área
de Igualdade da Deputación da Coruña.
A exposición é unha montaxe de 24
fotografías que retratan mulleres da Costa da Morte pertencentes a distintos
períodos cronolóxicos do século XX ata 1970, principalmente. As fotos foron
seleccionadas por recoller instantáneas protagonizadas por mulleres de todas as
idades e polo seu rol antropolóxico de avoas, nais e fillas. Por seren o
soporte dunha familia moitas veces esgazada en dous polo exilio e pola
emigración forzosa. Nas súas facianas latexa a dureza dos tempos que lles tocou
vivir. Cada imaxe do pasado vese homenaxeada por versos de poetas galegas do
presente; voces consagradas como a de Luz Pozo Garza -falecida hai xa máis dun
ano-, Helena Villar Janeiro, Pilar Pallarés, Olga Patiño ou máis novas como
Berta Dávila, , Lucía Aldao, Rosalía Fernández Rial...
O noso alumnado poderá gozar desta
pequena mostra de fotografías das máis de 67.000 que compoñen o Arquivo Vidal,
conservado no Museo do Mar de Laxe e así, pór en valor a fotografía como
testemuña da nosa historia, como ferramenta esencial da nosa memoria. Realizará
un percorrido acompañado de actividades didácticas sobre o significado da
composición das fotografías, a súa motivación e función e, sobre as voces
poéticas que representan o futuro.
